Kinda hulisha na kuongozwa. Hana uwezo wa kuongoza ama kulinda. Anapolinda kiota huenda kikawa mashakani. “Yawaje kinda alinda, kiotani mna nini?” Yawaje Kinda Alinda?


Yawaje Kinda Alinda?

Yawaimba za kushinda, sauti iso kifani,
Nyimbo utakazopenda, zijapo masikioni,
Hutazama wanopanda, mnalo fumbo mtini,
Yawaje kinda alinda, kiotani mna nini?

Ana sime tena panda, usalama yu makini,
Hakosi yake ajenda, fumbo tusilothamini,
Ameamua kutenda, yu dhabiti kwa imani,
Yawaje kinda alinda, kiotani mna nini?

Kikwazo amekiunda, utadhani gerezani,
Ndege nina amekwenda, kaselea ugenini,
Fununu zimeshatanda, umeshakuwa uneni,
Yawaje kinda alinda, kiotani mna nini?

Harufu ni ya kuvunda, itokayo humo ndani,
Bidhaa zilizoganda, oza usikotamani,
Jambo la mali kuponda, matumizi ya mapeni,
Yawaje kinda alinda, kiotani mna nini?

Maonesho anadinda, vilivyomo tubaini,
Tujue wanavyowinda, wafanyavyo mawindoni,
Nimesema yote kenda, la kumi usitamani,
Yawaje kinda alinda, kiotani mna nini?

Toa Jibu

Barua-pepe haitachapishwa. Fildi za lazima zimetiwa alama ya *

*