Kifo kina uhasama, waja kinawasakanya,
Kifo kinao unyama, huja bila kutuonya,
Kifo huwa ni hatima, kwa kila mtu hupenya,
Kifo hakina huruma, wahibu hutupokonya!
Kifo hakitapingika, tena hodi hakibishi,
Kifo huja kwa haraka, hatima kuwa mazishi,
Kifo kijapo hufoka, tena kwa wingi ubishi,
Kifo hukuweka shaka, kikawa bure bilashi!
Kifo jambo la kutisha, ukabaki kwa huzuni,
Kifo mauti hupisha, kawa uhai hunani,
Kifo hakitaridhisha, kitakupora amani,
Kifo suti hukuvisha, ukaishi kaburini!
Kifo hakitarajiwi, huja kwako kama mwizi,
Kifo na hakielewi, hukileta kizuizi,
Kifo hakikutambuwi, hakina utangulizi,
Kifo kina mengi mawi, twakijua kuwa uwazi!
Kifo huja kuchochea, uliapo kikacheka,
Kifo kasi hutokea, kwa yeyote kikafika,
Kifo hakitachelea, hujitapa na kuwika,
Kifo hakina ripea, mchangani hukuzika!
Kifo huwa ndio mwisho, wa safari duniani,
Kifo hutupa fundisho, tukabaki kubaini,
Kifo huwa nalo tisho, tukakosa tumaini,
Kifo hakijui kesho, kijapo ni buriani!
Kifo huwa ni kikwazo, aushi kitafupisha,
Kifo hakina likizo, duniani hugurisha,
Kifo hakina liwazo, huwezi kujiepusha,
Kifo kinao uwezo, jongomeo hukurusha!
© Kimani wa Mbogo (04/04/2023)
Kuhusu Shairi Hili
Shairi hili linaelezea kifo na jinsi linavyokuja bila kutarajiwa na kuleta huzuni, hofu, na uharibifu kwa maisha ya binadamu. Hapa ni uchambuzi wa shairi:
1. Dhana ya Kifo: Kutoka kwa mishororo ya kwanza, kifo kinachorwa kama adui wa binadamu, kikiwa na unyama, hakina huruma na kinawapokonya wapendwa wao.
2. Usaliti wa Kifo: Shairi linasema kuwa kifo hakipigiwi hodi, huja bila kutarajiwa. Licha ya hayo yote, hukuweka shaka juu ya uwepo wake.
3. Huzuni na Hofu: Kifo kinapoingia, huacha nyuma huzuni na kukatiza maisha, kukiacha chumba cha kaburi kama makao mapya.
4. Kifo kama Mwizi: Kifo kinachorwa kama mwizi, kinachojitokeza ghafla, na kusababisha kizuizi kwa maisha. Huja bila onyo na huwezi kutabiri linapokuja.
5. Kina na Athari: Kifo kinajivunia uwezo wake wa kuwatesa binadamu, bila huruma, bila kuchelea. Mwishowe, binadamu wanaishia mchangani, wakizikwa.
6. Kifo kama Mwisho wa Safari: Mishororo hii inasisitiza ukweli kwamba kifo ni mwisho wa safari ya maisha duniani, ikitoa funzo la kutubainisha ukweli wa maisha yetu.
7. Kifo Kama Kikwazo: Kifo kinachukuliwa kama kikwazo, kikiwa na uwezo wa kukatiza maisha ya binadamu wakati wowote, na hakuna pa kukikwepa.
Hitimisho: Shairi hili linaelezea kwa kina na kwa hisia kali jinsi kifo kinavyoathiri maisha ya binadamu, kuja bila kutarajiwa, na kuleta huzuni na uharibifu. Kwa kutumia lugha ya kisanii na mifano mbalimbali, shairi hili linatoa picha kamili ya jinsi kifo kinavyochukuliwa katika jamii. Ujumbe wake unagusia moyo na kufikirisha kuhusu maana ya maisha na ukweli wa kifo.
