Alikuwa kiongozi, aliyeongoza watu,
Alifanya nyingi kazi, kwa heshima tena utu,
Alikuwa na ujuzi, kuwe misingi yetu,
Aliyekufa yu hai, maana yake pasaka.
Alikuwa ni mwalimu, mfunzi na mwelekezi,
Alifunza ya nidhamu, na kushutumu ajizi,
Alipenda mwanadamu, akawa hampuuzi,
Aliyekufa yu hai, maana yake pasaka.
Alikuwa ateseke, apigwe kuhujumiwa,
Alitumwa asipendeke, aje kudharauliwa,
Alitoka kwa babake, lakini hawakujua,
Aliyekufa yu hai, maana yake pasaka.
Alikuwa ashukiwe, ahukumiwe na kufa,
Aliteswa auawe, japo aliacha sifa,
Aliteseka tujuwe, tena tupate maarifa,
Aliyekufa yu hai, maana yake pasaka.
Alikuwa asulubiwe, kwa dhambi za mwanadamu,
Alipigwa adhihakiwe, kisha mateso magumu,
Aligotwa wasijuwe, hakuwa tu ni mwalimu,
Aliyekufa yu hai, maana yake pasaka.
Alikuwa mwana wa Mungu, akafa msalabani,
Alikufa dhambi zangu, zifutwe na kuwa duni,
Alitoka ulimwengu, akenda zake mbinguni,
Aliyekufa yu hai, maana yake pasaka.
Alikuwa ana nguvu, kufa tena kufufuka,
Alikuwa nazo kovu, Tomaso kuwa hakika,
Alikuwa mtulivu, kuuawa kuteseka,
Aliyekufa yu hai, maana yake pasaka.
Alikuwa mwenye haki, huyo bwana msifika,
Alikuwa hajinaki, kwa kufa alitukuka,
Alitoka hakubaki, kaburini ametoka,
Aliyekufa yu hai, maana yake pasaka.
Alikuwa awe hai, alifufuka ya tatu,
Aliwekwa kwa madai, japo aliweza watu,
Alifanya hayafai, ni kwa manufaa yetu,
Aliyekufa yu hai, maana yake pasaka.
© Kimani wa Mbogo (22/04/2011)
Shairi hili linaelezea kwa kifupi historia ya maisha ya Yesu Kristo, ambaye kwa mujibu wa imani ya Kikristo, alikuwa mwana wa Mungu. Shairi hili linamwonyesha kama kiongozi mwenye hekima, mwalimu na mwelekezi ambaye alifanya kazi nyingi kwa heshima na utu. Alikuwa mtu aliyependa mwanadamu na alifundisha nidhamu. Hata hivyo, aliteseka sana na kudharauliwa na watu wengi, na hatimaye kusulubiwa kwa dhambi za wanadamu.
Shairi hili pia linamwonyesha Yesu kama mtu aliyekufa kwa ajili ya dhambi za wanadamu, na kwa kufa kwake, alifuta dhambi za wote ambao wataamini kwake. Hivyo, kifo chake hakikuwa mwisho, kwani alifufuliwa siku ya tatu na kwenda mbinguni. Kwa hiyo, shairi hili linamaanisha kuwa kifo chake kina maana ya kufufuka kutoka kwa wafu, kama vile Pasaka inavyomaanisha. Hii ni imani ya Kikristo kwamba Yesu Kristo alikufa na kufufuka ili kuwaokoa wanadamu kutoka kwa dhambi zao.
Shairi hili linatumia lugha ya ufasaha na ujuzi wa hali ya juu, na inaonyesha ustadi wa mtunzi katika kutumia maneno na mbinu za ushairi kuwasilisha ujumbe. Kwa ujumla, shairi hili ni kielelezo cha imani ya Kikristo katika kifo na ufufuo wa Yesu Kristo, na ni mfano wa jinsi gani tamaduni mbalimbali zinatumia ushairi kuelezea imani zao na maadili yao.
