Shujaa wa lugha yetu, tena mwandishi Hodari,
Alipenda sana watu, kwake ilikuwa heri,
Alipendelea utu, jina lake kifahari,
Shujaa twamkumbuka, Profesa Walibora.
Kwa Fasihi alikuwa, nguzo ilyo dhabiti,
Nyanja zote alituwa, akiwa na mikakati,
Mwandishi mengi alijuwa, tulivyojua hayati,
Shujaa twamkumbuka, Profesa Walibora.
Alituonyesha njia, ustadi kuandika,
Ilikuwa yake nia, Kiswahili kupendeka,
Sasa tunamtungia, mashairi kusifika,
Shujaa twamkumbuka, Profesa Walibora.
Riwaya zake aali, zakumbukwa hadi sasa,
Alipenda Kiswahili, hakuandika kwa pesa,
Sarufi aliijali, alivyoandika visa,
Shujaa twamkumbuka, Profesa Walibora.
Wengi alielimisha, kwingi hakukosekana,
Watu alihamasisha, kwa mazuri kila kona,
Kutunga alionyesha, hakika kupanga vina,
Shujaa twamkumbuka, Profesa Walibora.
Yalitufika majonzi, ikatuhepa bahati,
Aliondoka mlinzi, kazi nasi hatusiti,
Twaendelea kuenzi, uridhi wake kwa dhati,
Shujaa twamkumbuka, Profesa Walibora.
Maneno yake matamu, twahifadhi kwa vitabu,
Kazi yake ni muhimu, tusome kwa uraibu,
Kiswahili tufahamu, tuitetee ajabu,
Shujaa twamkumbuka, Profesa Walibora.
© Kimani wa Mbogo (02/04/2023)
Shairi hili ni la kuenzi na kutukuza mchango wa Profesa Ken Walibora katika fasihi ya Kiswahili. Linatupa picha ya mtu aliyekuwa shujaa katika tasnia ya fasihi ya Kiswahili, ambaye alikuwa na ujuzi mkubwa na alikuwa akitoa mchango mkubwa katika kuendeleza lugha hii ya Kiafrika.
Shairi hili linaelezea jinsi Profesa Walibora alivyokuwa mwandishi hodari aliyependa sana watu, na alifanya kazi yake kwa bidii na kujitolea. Pia, inaelezea jinsi alivyokuwa nguzo imara katika fasihi ya Kiswahili, akionyesha ustadi wake katika kuandika riwaya, mashairi na vitabu vingine. Zaidi ya hayo, shairi hili linamuelezea kama mtu aliyekuwa akijali sana lugha ya Kiswahili na kuhakikisha kuwa anaiendeleza kwa njia sahihi.
Shairi hili ni la kusisimua na linalenga kumkumbuka Profesa Walibora kwa mchango wake mkubwa katika fasihi ya Kiswahili. Inatukumbusha umuhimu wa kuendeleza lugha yetu na kuwahimiza wengine kufuata nyayo za Profesa Walibora katika kukuza lugha hii. Kwa ujumla, shairi hili ni la kuvutia na linaonyesha jinsi fasihi ya Kiswahili inavyopewa umuhimu mkubwa na watu wake.
