Nakupenda, wangu mleta-amani,
Umetenda, mengi yasiyo kifani,
Nitakonda, siha nikose mwilini,
Umekwenda, umeniacha mwandani?
Umeunda, nyingi raha mtimani,
Limetanda, sikitiko la huzuni,
Hujadinda, muhibu kuniauni,
Umekwenda, umeniacha mwandani?
Unadunda, moyo hauna hisani,
Ulikanda, mwili wangu kuubuni,
Langu tunda, kaanguliwa mtini,
Umekwenda, umeniacha mwandani?
Hujaenda, unitie tatizoni,
Miye kinda, kaniacha kiotani,
Umepanda, ukenda zako ngazini.
Umekwenda, umeniacha mwandani?
Langu banda, umelitia jichoni,
Umependa, umetaka ukwasini,
Umetenda, kanitia maafani,
Umekwenda, umeniacha mwandani?
Menishinda, mahaba huyabaini,
Umedinda, muhibu kuniamini,
Ukatenda, hilo la uhayawani,
Umekwenda, umeniacha mwandani?
Umeranda, ukaenda faraghani,
Kunipenda, si kuniacha mwendani,
Ka’ ni rinda, takupeleka dukani,
Umekwenda, umeniacha mwandani?
Nakupenda, ela una walakini,
Hutokwenda, kulima huko kondeni,
Nina gunda, hutaki zangu kanuni,
Umekwenda, umeniacha mwandani?
Nakupenda, sitokuacha mwendani,
Nitarunda, wenendapo mafichoni,
Ndugu donda, litaniweza moyoni,
Umekwenda, umeniacha mwendani?
Nakupenda, sipendi kwenu nyumbani,
Wanitenga, usemapo baitini,
Nitatenda, ujapo mwangu chumbani,
Umekwenda, uniacha mwandani?
Nakupenda, sitoufanya uhuni,
Takulinda, tupige soga chumbani,
Yatawanda, mahaba yasiwe duni,
Umekwenda, umeniacha mwandani?
Nakupenda, mrembo nakubaini,
Umeshinda, wewe wangu nakwamini,
Menipanda, uzuzu mwangu kichwani,
Umekwenda, umeniacha mwandani?
Umedinda, kunitoroka mwandani,
Yakupanda, ya hasira akilini,
Kwake nenda, mwambie aje chumbani,
Umekwenda, umeniacha mwandani?
Liko rinda, nitakupa la thamani,
Kurandanda, wacha tuende nyumbani,
Lipo banda, tatufaa kijijini,
Umekwenda, umeniacha mwandani?
© Kimani wa Mbogo (01/07/2010)
Shairi linanasa mtazamo wa mtu anayejikuta ameachwa pekee yake. Kuna mahusiano mazito ya kihisia kati ya mwandishi na mpenzi wake, ambapo kila beti inaonyesha jinsi mwandishi anavyoshikilia kumbukumbu za mpenzi wake.
“Umekwenda, umeniacha mwandani?” Huu ni mshororo unaorudiwa mara kwa mara, unaotumika kusisitiza huzuni na upweke anaojisikia mwandishi. Mshororo huu pia unaonyesha umuhimu wa mpenzi wake katika maisha yake.
Shairi linagusia pia mambo ya kibinadamu kama kujisikia kutendwa, kujisikia kuachwa pekee, na kuhisi kuchezewa. Kuna mahali ambapo mwandishi anahisi kuwa mpenzi wake amemfanyia uhayawani na kutoroka bila taarifa. Haya yote yanaonyesha jinsi mapenzi yanavyoweza kuleta hisia tofauti kwa binadamu.
Mwandishi pia anagusia jinsi anavyotamani kuendelea kuwa pamoja na mpenzi wake. Kwa mfano, anasema “Nakupenda, sitokuacha mwendani”, akimaanisha kuwa bado anashikilia matumaini ya kumrudia mpenzi wake.
Katika sehemu nyingine za shairi, mwandishi anaonyesha utayari wa kufanya lolote ili kurudisha upendo wa mpenzi wake, hata kumtumia zawadi kama rinda.
Mwisho, shairi hili linaonyesha jinsi mapenzi yanavyoweza kumfanya mtu ahisi hisia kali na tofauti, kutoka kwa furaha, huzuni, kukata tamaa, na matumaini. Linaonyesha umuhimu wa mawasiliano na uwazi katika uhusiano ili kuepuka maumivu ya kihisia.
